رسمِ مہر و وفا کی بات کریں
پھر کسی دلربا کی بات کریں
سخت بیگانہ ءِ حیات ہے دل
آؤ اس آشنا کی بات کریں
زلف و رُخسار کے تصوّر میں
حسن و ناز و ادا کی بات کریں
گیسوؤں کے فسانے دہرائیں
اپنے بختِ رسا کی بات کریں
مدّعائے وفا کسے معلوم
دلِ بے مدّعا کی بات کریں
کشتی ءِ دل کا ناخدا دل ہے
کیوں کسی ناخدا کی بات کریں
بھول جائیں جہاں کے جور و ستم
اپنی مہر و وفا کی بات کریں
ہم سے آزردہ ہے تبسّم دوست
اسی حسنِ ادا کی بات کریں
صوفی تبسّم
کوئی تبصرے نہیں:
ایک تبصرہ شائع کریں